كيف تحدد الدعم والمقاومة؟ الطريقة خطوة بخطوة

الدعم والمقاومة من أهم أساسيات التحليل الفني. هنا نشرح لك الطريقة اللي تستخدمها زهرة بالضبط — نفس الخطوات ونفس الأرقام — عشان تقدر تطبّقها بنفسك على أي شارت، أو تخلّي زهرة تسويها لك في ثواني.

▶ فيديو ١: كيف تحدد الدعم والمقاومة على الشارت؟

وش يعني الدعم والمقاومة؟

الدعم منطقة تحت السعر سبق وارتد منها السهم لفوق — يعني المشترين دخلوا عندها. المقاومة منطقة فوق السعر سبق ونزل منها — البايعين كانوا أقوى هناك. انتبه إنها مناطق مو أسعار بالهللة: السعر ممكن يلمسها أو يتجاوزها شوي ويرجع.

الخطوة ١: افتح الشارت اليومي

خذ آخر ١٠٠ إلى ١٥٠ شمعة يومية تقريبًا (حوالي ٥ إلى ٧ شهور). أقل من كذا ما يكفي يبيّن المستويات المهمة، وأكثر بكثير يجيب لك مستويات قديمة السوق نساها.

الخطوة ٢: علّم القمم والقيعان الحقيقية

مو كل ذيل شمعة قمة. القمة الحقيقية شمعة أعلى سعر فيها أعلى من الشمعتين اللي قبلها والشمعتين اللي بعدها. والقاع الحقيقي بالعكس: أوطى سعر فيها أوطى من الشمعتين قبلها والشمعتين بعدها. هذي طريقة معروفة اسمها Fractal.

ليش نستنى شمعتين بعدها؟ عشان ما نسمّي قمة شي لسه ما تأكد — ممكن بكرة السعر يطلع فوقه.

الخطوة ٣: الدعم من القيعان، والمقاومة من القمم

• الدعم الحالي = أقرب قاع حقيقي تحت السعر، والدعم التالي = اللي بعده.
• المقاومة الحالية = أقرب قمة حقيقية فوق السعر، والمقاومة التالية = اللي بعدها.
• لو مستويين قريبين من بعض (الفرق أقل من ١٫٥٪) نعتبرهم مستوى واحد — عشان «التالي» يكون فعلًا مستوى مختلف.

الخطوة ٤: حدد الاتجاه

قارن آخر قمتين وآخر قاعين: لو القمم والقيعان تطلع لفوق فالاتجاه صاعد، ولو تنزل فهو هابط. ولو الصورة مو واضحة، قارن آخر إغلاق بمتوسط آخر ١٠ إغلاقات: فوقه صاعد، تحته هابط.

الخطوة ٥: وين تحط وقف الخسارة؟

زهرة تحط الوقف تحت الدعم التالي بـ٢٪، مو تحت الدعم الحالي مباشرة. السبب إن الدعم الحالي كثير ينكسر لحظيًا ويرجع — والوقف اللي تحته مباشرة يطلّعك من الصفقة قبل لا يرجع السهم.

حالة خاصة: السهم تحرك حركة حادة

لو السهم تحرك ١٥٪ أو أكثر في آخر ١٠ شموع، أقرب قمة أو قاع مؤكد ممكن يكون بعيد مرة عن السعر — لأن الشموع اللي بعد الحركة لسه ما كوّنت قمم وقيعان جديدة. هنا، لو أقرب مستوى مؤكد أبعد من ٨٪، نعطيك مستوى مرحلي بامتداد فيبوناتشي (١٫٢٧٢ و١٫٦١٨) على نفس الحركة، ونكتب لك بوضوح إنه مرحلي لين يتكوّن مستوى مؤكد.

أخطاء تخلّي الدعم والمقاومة ما يشتغلون

• خط على كل ذيل شمعة: الشارت يمتلي خطوط وما تعرف أيها المهم. التزم بالقمم والقيعان الحقيقية بس.
• تعامل المستوى كسعر بالضبط: السوق يحترم مناطق، مو أرقام بالهللة.
• نسيان الفريم: دعم فريم الساعة غير دعم اليومي. لا تخلطهم.
• تنزيل الوقف لما السعر يقرب منه: هذا أكثر شي يكبّر الخسارة.

▶ فيديو ٢: ٣ أخطاء تخسّرك حتى لو اخترت أسهم قوية

طيب، هل الطريقة تنفع فعلًا؟

لا تصدقنا، شوف بنفسك: كل قراءة في صفحات الأسهم تنحفظ بتاريخها، وبعد ٥ جلسات نكتب في سجل النتائج هل السعر احترم المستوى ولا كسره — بدون تعديل ولا حذف.

شوف الطريقة مطبّقة على أسهم حقيقية: أرامكو · الراجحي · سابك · إس تي سي · الأهلي · الإنماء · كل القراءات

▶ فيديو ٣: السهم قبل الانفجار السعري: كيف تلمحه؟